'वीर योद्धा प्रतिष्ठान'चा दणका; फलटण भूमी अभिलेख प्रशासनाची पळापळ! उपअधीक्षकांच्या लेखी आश्वासनानंतर 'हलगी नाद' आंदोलन तात्पुरते स्थगित; कामात सुधारणा न झाल्यास तीव्र संघर्षाचा इशारा

 

‘वीर योद्धा प्रतिष्ठान’चा दणका; फलटण भूमी अभिलेख प्रशासनाची पळापळ!

उपअधीक्षकांच्या लेखी आश्वासनानंतर ‘हलगी नाद’ आंदोलन तात्पुरते स्थगित; सुधारणा न झाल्यास तीव्र आंदोलनाचा इशारा

फलटण : येथील उपअधीक्षक भूमी अभिलेख कार्यालयातील कथित गलथान कारभार आणि नागरिकांना होत असलेल्या त्रासाविरोधात ‘वीर योद्धा प्रतिष्ठान’ने दिलेल्या आंदोलनाच्या इशाऱ्याची प्रशासनाने गंभीर दखल घेतली आहे. प्रतिष्ठानचे संस्थापक अध्यक्ष मा. श्री. अमित (बापू) विजयराव ढावरे यांनी दिलेल्या ‘हलगी नाद’ आंदोलनाच्या इशाऱ्यामुळे प्रशासकीय यंत्रणा सतर्क झाली असून, उपअधीक्षकांनी आपल्या सर्व अधिकारी व कर्मचाऱ्यांना लेखी स्वरूपात कडक सूचना दिल्या आहेत.

नेमके प्रकरण काय?

महाराष्ट्र राज्य शासनाच्या अधिपत्याखाली चालणाऱ्या या कार्यालयात नागरिकांची कामे वेळेत होत नसल्याच्या तसेच काही प्रकरणांमध्ये आर्थिक आमिषामुळे नागरिकांना नाहक त्रास दिला जात असल्याच्या तक्रारी समोर आल्या होत्या. याच्या निषेधार्थ ९ मार्च २०२६ रोजी उपविभागीय अधिकारी (प्रांत) यांच्या दालनात ‘हलगी नाद’ आंदोलन करण्याचा इशारा वीर योद्धा प्रतिष्ठानच्या वतीने देण्यात आला होता.

प्रशासनाचा ‘यू-टर्न’ आणि लेखी हमी

आंदोलनाच्या पार्श्वभूमीवर उपअधीक्षक भूमी अभिलेख, फलटण यांनी जा.क्र. ५७८/२०२६ या अधिकृत पत्राद्वारे कार्यालयातील सर्व अधिकारी व कर्मचाऱ्यांना नागरिकांची कामे विहित वेळेत पूर्ण करण्याच्या आणि जनतेशी सौजन्यपूर्ण वर्तन करण्याच्या कडक सूचना दिल्या आहेत. तसेच प्रशासनाने सकारात्मक पाऊल उचलल्याने नियोजित आंदोलन करू नये, अशी विनंतीही पत्राद्वारे करण्यात आली आहे.

आंदोलन स्थगित; पण इशारा कायम

उपअधीक्षकांच्या लेखी आश्वासनानंतर वीर योद्धा प्रतिष्ठानने सदर आंदोलन तात्पुरत्या स्वरूपात स्थगित करण्याचा निर्णय घेतला आहे. मात्र, भूमी अभिलेख कार्यालयाच्या कामकाजात लवकरात लवकर सुधारणा झाली नाही, तर पुढील काळात अधिक तीव्र आंदोलन छेडले जाईल, असा इशारा प्रतिष्ठानच्या वतीने देण्यात आला आहे.

या प्रकरणाचे गांभीर्य लक्षात घेऊन संबंधित पत्राच्या प्रती जिल्हाधिकारी सातारा, जिल्हा पोलीस अधीक्षक आणि तहसीलदार फलटण यांना देखील माहितीसाठी पाठवण्यात आल्या आहेत.

“प्रशासकीय कार्यालये ही जनतेच्या सेवेसाठी आहेत. लेखी आश्वासनानंतरही जर भ्रष्ट कारभार सुरूच राहिला, तर प्रशासनाला आमच्या रौद्र रूपाला सामोरे जावे लागेल.”
— मा. श्री. अमित (बापू) विजयराव ढावरे
संस्थापक अध्यक्ष, वीर योद्धा प्रतिष्ठान