नीरा: मागील एका महिन्यापासून बेपत्ता असलेल्या शिक्रापूर येथील तरुणाला त्याच्या कुटुंबापर्यंत पोहोचवण्यात 'वीर योद्धा प्रतिष्ठान'च्या कार्यकर्त्याला यश आले आहे. ओंकार भैय्या धायगुडे यांच्या सतर्कतेमुळे आणि माणुसकीमुळे संदीप दादा अडगळे हा तरुण पुन्हा आपल्या आईच्या कुशीत परतला असून, या कार्याचे सर्वत्र कौतुक होत आहे.
नेमकी घटना काय?
शिक्रापूर येथील रहिवासी असलेले संदीप दादा अडगळे हे मागील एक महिन्यापासून घरून बेपत्ता झाले होते. त्यांचे कुटुंब त्यांचा सर्वत्र शोध घेत होते, मात्र कोणताही पत्ता लागत नव्हता. दरम्यान, ऊस संशोधन केंद्र परिसरात संदीप हे एकटेच फिरताना ओंकार भैय्या धायगुडे यांना आढळले. त्यांची अवस्था आणि वागणूक पाहून ओंकार यांनी तातडीने त्यांची विचारपूस करण्यास सुरुवात केली.
जेवण देऊन केली विचारपूस
संदीप हे भुकेलेले असल्याचे लक्षात येताच ओंकार धायगुडे यांनी सर्वप्रथम त्यांना प्रेमाने जेवण दिले. त्यानंतर विश्वासात घेऊन चौकशी केली असता, त्यांच्या घरचा पत्ता मिळाला. ओंकार यांनी तातडीने नीरा पोलीस चौकी गाठून पोलिसांना या घटनेची माहिती दिली आणि संदीप यांच्या कुटुंबाशी संपर्क साधला.
आईच्या डोळ्यात आनंदाश्रू
मुलगा महिनाभरापासून बेपत्ता असल्याने हवालदिल झालेल्या आईला जेव्हा तो सुखरूप असल्याची बातमी मिळाली, तेव्हा त्यांच्या आनंदाला पारावर उरला नाही. संदीप यांना सुखरूप घरी पोहोचवल्यानंतर त्यांच्या आईने 'वीर योद्धा प्रतिष्ठान, महाराष्ट्र राज्य' आणि ओंकार धायगुडे यांचे मनापासून आभार मानले. "माझा मुलगा मला परत मिळेल अशी आशा सुटली होती, पण या संकटकाळात ओंकार भैय्या देवासारखे धावून आले," अशा भावना त्यांनी व्यक्त केल्या.
"समाजातील गरजूंना मदत करणे हे आपले कर्तव्य आहे. संदीप यांना त्यांच्या कुटुंबापर्यंत सुखरूप पोहोचवू शकलो, याचे मोठे समाधान आहे."
— ओंकार भैय्या धायगुडे (कार्यकर्ता, वीर योद्धा प्रतिष्ठान)
.png)
